Namal
වනඅලි රංචුවක නායකත්වය හිමි වන්නේ අත්දැකීම් බහුල ගැහැණු සතෙකුට වන අතර ඈ තම රංචුව පිළිබදව නිරන්තර අවධානයෙන් පසු වේ . එබැවින් රංචුව නියෝජනය කරනා කිසිවෙකුත් හෝ අනතුරකට භාජනය වන තීරණයක් ඇය නොගනියි. පිරිමි පාර්ශවය නියෝජනය කරන්නවුන් ස්වකීය ආලවන්තකම් පෑමට පමණක් මෙවැනි වු රංචුවක් වෙතට ඇදී එන අතර ඔහුගේ ආරාධනය පිළිගන්නා ගැහැණු සත්වයෙකු සමග බාන්හාදකම් බැදීම සිදු වේ. අනතුරුව මෙවැනි වු ආලවන්ත හමු වීම් කිහිපයකින් අනතුරුව එම රංචුව අතැර යළිත් සුපුරුදු තනිකමට පිවිසෙන පිරිමි සතුන් එතැන් පටන් තනිකඩ වනසංචාරයට පිවිසේ. තම ආදරයේ සංකේතය වන කුස පිළසිදගත් දරු ගැබ ක්‍රමානු කූලව මෝරා එත්ම දරු ප්‍රසුතිය සදහා සූදානම් වන ඇතින්නියන් හා කෙණරුන් රංචුවේ සෙසු ගැහැණු සාමාජිකාවන්ගේ අවධානය ලබා ගනියි. ඔවුන් ගේ ආරක්ෂාව පිළිබදව සැවොම එකාවන්ව සොයා බලයි. එයට ද හේතුවක් ඇත. මන්ද යත් මේ රැළ නියෝජනය කරනා සියළුම සමාජිකාවෝ ලේ නෑ කමින්ද සමානයෝ වෙති. එනම් ආච්චි, දුව , නැන්දා, මිණිබිරි, අක්කා, නංගි, ලොකු අම්මා ආදි සවිමත් වු ලේ බැදීමකින් ඔවුන් බැදි සිටියි. එබැවින් තම රැළේ කවරෙකුට හෝ පුංචි පැටියෙක් උපදින්නේ නම් ඔහුගේ ආරක්ෂාව පිළිබදව රංචුවේ සැවොම එකාවන්ව සොයා බලයි. “ඇතිනි රැළේ සැමටම කිරි එරෙයා” පිරුළ ජන ගතව ඇත්තේද මේ හැසිරීම් රටාව මුල් කර ගෙන විය යුතුය.
“නාමල්” .... ,
සැබැවින්ම කවුද මේ නාමල්? උඩවලව ඇත් අතුරු සෙවණට පැමිණෙන කාගෙත් නෙතට කදුළක් එක් කිරීමට සමත් වු නාමල් ගේ කතාන්තරය හරහා අපට බෝහෝ දෑ උගත හැකිය. වනයේ අතරමංවු පුංචි අලි පැටවෙක්, මෙදවසදී “නාමල්” නමින් සැමගේ ආදරය දිනා ගනිමින් ආඩම්බරයෙන් හිස ඔසවා ගෙන සිටීම තෙක් වු ගමන් මගෙහි පසු පසින් සිටිනුයේ අධිෂ්ඨානශීලී මිනිසුන් කණ්ඩායමකි. නාමල් ගේ ජීවිතය බේරා ගැනීම සදහා දිවා රූ නොබලා වෙහෙසුණු ඔවුන් තම ශ්‍රමයට සරිලන පැසසුම් හෝ කිසිවිටෙකදී වත් නොපැතූහ.
උඩවලව ඇත් අතුරු සෙවණ පෙර සදහන් කළ පරිදි අභය ස්ථානයක් වශයෙන් හැදින් වීමේ ලා මා තීරණය කලේ යම් කරුණක් ඒ හරහා ස්මතු කරන අටියෙනි. මවගේ උණුසුම පසුබීමේ කිරිඋරමින් සිටින වයසේ පසු වන වනඅලි පැටවෙකු වනයේ අතරමංවීම යනු නියත වශයෙන්ම මරණයට අත වැනීමක්ද වන්නේමය. මන්ද යත් වනාන්තරය යනු අතුරු අන්තරාවන් රැසක් නිරන්තරවම ඔබ - මොබ සරනා ප්‍රදේශයක් වශයෙන්ද හැදින් විය හැකිය. ගලක් පසු පස සිට, මහා වනස්පතියක් මත සිට, පදුරු ගොමුවක් තුළ සිට හෝ දිය කඩිත්තක් මත්තෙහි සිට මරණයේ ඉරණම් කරු අසරණ වු වනජීවීතයන් සොයා පැමිණිය හැකිය. මව් උණුහුමින් මිදී අතරමංවන වනඅලි පැටවුන් පළමුව කරනුයේ යා යුතු මගක් හෝ නොදැන ඉබා ගාතේ දිවීමය. හති වැටෙන තුරු දිව යන ඔවුන් සාගින්දරින් ගත දැවෙන කල අයිනකට වී නිදන්නට සිතයි. ඔය ආකාරයෙන් නිරුපද්‍රිතව දින, දෙක තුන ගත කළ හැකි වුවත් වනය පිළිබදව හරියාකාරව නොදත් ඔවුහු අවසන සිව් පා වාරු නැතිව ඇද වැටෙයි. මිනිසුන් ඇස ගැටෙන මානයක දී නම් ඔවුන්ගේ පිහිටට කවුරුන් හෝ ඉදිරි පත් විය හැකි වුවත් , මිනිස් ඇස නොගැටුණු මහා වනාන්තරය මධ්‍යයේ දී නම් තත්වය ඉදුරාම වෙනස් විය හැකිය.
මෙම කතාන්තරයට අවැසි වස්තූබීජය සපයන “ නාමල් ” මුලින්ම හමු වන්නේ 2012 වසරේ දීය. එනම් වනාන්තරයේ තුවාල වී කෑ මොර ගසනා, අතරමංවු අලි පැටවෙක් පිළිබදව විපරම් කර තොරතුරු දැන ගන්නා ධීවරයෙක් එම පුවත සම්බන්ධයෙන් අම්පාර වනජිවී සෞඛ්‍ය කළමනාකරණ ඒකකයට අනුයුක්තව සෙවයේ නියුතු කේ.කේ.උපුල් ප්‍රියංග මහතා වෙත දැනුම් දී ඇත. “ මහත්තයෝ පුංචි අලි පැටෙක් , නාමල්ඔය වැවේ පට්ටිය කිද කණ්ඩියේ කැලැව ඇතුළට වෙන්ට කෑ මොර ගහනවා, මොකක් නමුත් විපැත්තියක්, හනික විපරම් කරලා බලන්ට ” පණිවුඩය ලබා ගත් උපුල් වහාම ක්‍රියාත්මක විය. පශු වෛද්‍ය ප්‍රමුදිත දේවසුරේන්ද්‍ර මහතාටද මේ සම්බන්ධව දැනුම් දීමෙන් අනතුරුව ලද ආරංචිය පිළිබදව විපරම් කිරීම සදහා නාමල්ඔය වනජීවී කාර්යාලයට පැමිණ එහි නිලධාරීන් සමග නාමල් ඔය වැවේ පට්ටිය කිද කණ්ඩියේ කැලෑ ප්‍රදේශය අවට විපරම් කර බලා ඇත.
“අපි හැමෝම එකතුවෙලා කැලැව අවට විපරම් කළා. ඔහොම හෝදිසි කරද්දි ඇහුණා සතෙක් හීන් හඩින් කරන කෙදිරියක්. ආන්න ඒ කෙදිරිය ආපු දිහාට යද්දින් දැක්කා මේ කෙදිරිය එන්නේ කලවැල් ගාලක් අද්දරින් බව. මේ කලවැල් ගාල ළගට ගිහින් බලද්දින් දුටුවේ හරිම දුක හිතෙන සිදුවීමක්. කලවැල් ගාලේ පැටලී හිටියේ වයස අවුරුද්දකටත් අඩු පුංචි අලි පැටෙක්. හරිම දුර්වල තත්වයෙන් තමයි උන්නේ. මොකද මේ වැල් ගාලේ පැටලීමෙන් පස්සේ මෙයා ඒකෙන් ගැලවෙන්නට හරියට මහන්සි වෙලා තියෙනවා. කිරි උරා බොන වයසේ පසු වුණු මේ අලි පැංචා කිරි බොන්නට බැරි වුණු හින්දා උන්නේ හාමතින්. මම හිතන්නේ මෙයා අම්මාගෙන් මග හැරිලා , අතරමං වෙලා, ඔබ - මොබ දුවද්දි මේ කලවැල් ගාලේ පැටලෙන්නට ඇති. ඉතින් අපි හැමෝම යුහුසුළුව ක්‍රියාත්මක වුණා. අසාද්‍ය තත්වයේ සිටි වනඅලි පැටවා පැටලි උන්න කල වැල කපලා ධීවර සමිතියේ බෝට්ටුවකින් තොටුපළට රැගෙන ඇවිත් එතැන ඉදලා අම්පාර පශු වෛද්‍ය ඒකකයේ වාහනයකින් අම්පාර පශුවෛද්‍ය කාර්යාලයට අරගෙන ඇවිත් පශු වෛද්‍ය ප්‍රමුදිත දේවසුරේන්ද්‍ර මහතාගේ මූලිකත්වය යටතේ අවශ්‍ය කරන ප්‍රතිකාර සිදු කළා. එහිදි අලි පැටවාට ලබා දුන් ප්‍රථමාධාර සහ කිරි ආහාර හේතුවෙන් නැගීටීමටවත් නොහැකි තත්වයේ පසු වුණු වනඅලි පැටවා සිව්පා පොළවේ තබමින් නැගිටීමට සමත් වුණා” “ඇත්තටම උපුල් අපි දන්නවා පුංචි අලි පැටියෙක් කියන්නේ එයාගේ අම්මගේ , රංචුවේ අනෙක් ඇතින්නන්ගෙත්, කෙණරන්ගෙත් ආදරය සහ ආරක්ෂාව යටතේ උස් මහත් වන කෙනෙක්. ඉතින් එහෙම තියෙද්දිත් මේ පුංචි අලි පැටවා අතරමං වුණේ කොහොමද? ”
නාමල් අද ඉන්න තත්වය ගැන මට තියෙන්නේ සතුටක්. එදා අසරණව හිටිය නාමල්ද මේ ඉන්නේ ? මම මගෙන්ම අහන අවස්ථාවන් අපමණයි. කැලේ කලවැලක පැටලී මරණයේ වේදනාවෙන් දගළපු නාමල්ද අද මේ දුව පැන ඇවිදින්නේ. ඉතින් අද නාමල්ට ජාත්‍යන්තරයේත් අවධානය යොමු වෙලා තියෙන මොහොතකදී මම අතීතය සහිපත් කළේ කාරණාවන් කිහිපයක්ම හිතේ තියා ගෙනයයි. නාමල් පිළිබදව තොරතුරු ලබා දීපු නාමල්ඔය ගැමියාගේ හිටන් කෘතිම පාදයක් ලබා දෙමින් නාමල්ට යළිත් ඇවිදිමේ වරම් ලබා දීම සදහා වෙහෙසුණු සැවොම මම සහිපත් කරන්නේ කෘතඥතා පූර්වකවයි. නමුත් නාමල් පිළිබදව කථාවෙන හැම විටෙකදීම කථා නොවෙන පිරිසකුත් පසු පස සිටිනවාය කියන දේ අපි අමතක නොකළ යුතුයි.
 |
| උපුල් ප්‍රියංග |
“ නාමල් අලි දැන් ලොකුයි. මේ පැටියා උඩවලවේ ඇත් අතුරු සෙවණ භාරයට ලැබෙන කොට පුංචිම පුංචි පැටියෙක්. එදා පුංචියට උන්නු නාමල් අද තරුණ වියට පා තබන සද්දන්ත කුලේ සාමාජිකයෙක්ගේ ලක්ෂණ පෙන්නුම් කරනවා. ඒක දකින කොට මට හරිම සතුටුයි. නාමල් උඩවලව ඇත් අතුරු සෙවණට එනකොට මං වැඩ කළේ ඇත් අතුරු සෙවණේ බාහිර රෝගී අංශයෙයි. මට පැවරිලා තිබුණේ අවතැන් ව ඇත් අතුරු සෙවණට භාර වෙන සතුන්ට අවශ්‍ය වෛද්‍ය ප්‍රතිකාර සදහා වනජීවී පශූ වෛද්‍යතුමන්ලා ඇතුළු කාර්යය මණ්ඩලයට අවශ්‍ය සහය ලබා දීම වගේම ඒ සතුන්ට අවශ්‍ය ආහාර පානාදිය ලබා දීමයි. නාමල් මුල් දවස් වල හොදින් උන්නා. පස්සේ පස්සේ එයාගේ ආබාදයට ලක් වුණු කකුලේ තුවාලයක් ඇවිත් ඒ කකුලෙන් කොටසක් අයින් කරන්න උනා. ඒ සැත්කම ඇත් අතුරු සෙවණ භාරව උන්නු වනජීවී පශූ වෛද්‍ය විජිත පෙරේරා සර්ගේ මූලිකත්ත්වයෙන් පේරාදෙණිය වෛද්‍ය පීඨයේ සහයෙන් සාර්ථකව සිදු වුණා. ඒ සැත්කමට පස්සේ නාමල්ගේ තුවාලේ හොද වෙනකන් එයාව හොද පරිස්සමට භාර ගන්න වගකීම පැවරුණ අය අතරින් මමත් කෙනෙක්. නාමල් සැත්කමට භාජනය වෙලා පිටිපස්සේ කකුලට වෙලුම් පටි යොදලා මාස කිහිපයක්ම තියන්න වුණේ කකුලට විෂබීජ නොයන්න වගේම කකුලේ තුවාලේ වේලෙනකන්. ඒත් මේ අලි පැටියව එක තැනම තියා ගෙන ඉන්න එක ඒ පැටියගේ සෞඛ්‍ය තත්ත්වයට ගැටලු ඇති කරන තත්ත්වයක් දක්වා වර්ධනය වෙන එක නවත්තන්නත් එක්ක වනජීවී පශූ වෛද්‍ය විජිත සර් නිර්දේෂ කළා අලි පැටියව ඇවිද්ද වන්න. ඒක හරිම පරිස්සමට කරන්න ඕන දෙයක්. මොකද පිටි පස්සේ කකුල බිමට තියලා වීරිය ගද්දි තුවාලේ පෑරෙන්න තියෙන ඉඩ වැඩියි. ඒ නිසා නාමල් පිටි පස්සේ කකුල බිමට තියන කොටම මම ඒ කකුලට යෙදෙන බලයෙන් තුවාලේ තෙරපෙන එක නවත්තන්න වෙලුම් යොදපු කකුල බිමට නොහිටින්න මගේ වීරියෙන් අත් දෙකින් උස්සනවා. මගේත්, අපේ අනික් අයගෙත් සහයෙන් නාමල් මේ විදිහට තුවාලේ වේලෙනකන්ම ඇවිද්දුවා. ඒක නාමල්ගේ සෞඛ්‍ය තත්ත්වය රැක ගන්න හොද ව්‍යයාමයක් උනා වගේම පැටියෙක් වුණාට අලියෙක්ව ඇවිද්දවනවා කියන එක අපිටත් වෙහෙසකර වුණු ව්‍යායාමයක් වුණ බව අමුතුවෙන් කියන්න ඕන නෑනේ”
 |
| සාලින්ද බුද්ධික මනම්පේරි |
පිටිපස වම් පාදයේ සැත්කමෙන් අනතුරුව නාමල්ට කෘතිම කකුලක් නිර්මාණය වන්නේද වනජීවී නිලධාරීන්ගේ අදහසකට අනුවය. ඒ සදහා ශ්‍රී ලංකාවේ කෘතිම පාද නිෂ්පාදනයට මුල් වු සමාගම් කිහිපයක්ම තමන්ගේ දායකත්ත්වය නොමසුරුව ලබා දී ඇත. නාමල්ට පළමු කෘතිම පාදය නිර්මාණය වු ආකාරය ගැන සාලින්ද මෙසේ පවසයි.
“ ඔව් මට මතක විදිහට නාමල්ට ඉස්සෙල්ලාම කෘතිම පාදේ හදන්නේ කළුතර අවාස් කියන ආයතනය විසින්. ඒ අය මුලින්ම නාමල්ගේ සැත්කමට භාජනය වුණු කකුල පාස්ටෝ පැරිස් කියන ආලේපයෙන් වහලා පාදයේ ආකෘතියක් සකස් කළා. ඒ ආකෘතියට අනුව තමයි නාමල්ගේ බර දරා ගන්න පුළුවන් විදිහට පළමු කෘතිම පාදය හැදුවේ. ඒ පාදයේ අඩියට ස්පොන්ජී වැනි දේ දැමුවේ අලියගේ කකුලේ සැත්කම් කරපු තැන ආරක්ෂා වෙන විදිහටයි. මුලින් මුලින් මේ කෘතිම පාදේ පැළද ගෙන ඇවිදින එක නාමල්ට නුහුරු වුණත්, පස්සේ පස්සේ එයා ඒ පාදය පැළදගෙන ඇවිදින්න පුරුදු පුහුණු වුණා. මේ කෘතිම පාදේ මාස අටෙන් අටට විතර වෙනස් කරන්න වුණේ නාමල්ගේ වර්ධනයට සමගාමීවයි. මේ කාර්යය සදහා ඊට අදාළ ආයතන කිහිපයකින්ම අවශ්‍ය සහය නොඅඩුව ලැබුණු බවත් කෘතවේදීව මතක් කරන්න ඕනි.”
අසරණව සිටි නාමල් අලි පැටවා පසු පස සිටිමින්, නාමල්ට ශක්තියක් වෙමින්, අනාගතයේ දිනෙක ශක්ති සම්පන්න හස්ති රාජයෙකු ලෙසින් වර්ධනය වන බවට පෙර මග ලකුණු වර්තමානයේ පහළ කරනා මේ අලි පැටවාගේ දිවිය මේ දක්වා ඔසවා තැබූ අයවලුන් අතරේ උපුල් ප්‍රියංගත්, සාලින්ද මනම්පේරිත් ඒ අතීත මතකයන් අතරට සම වැදෙමින් ස්මතු කළ යථාර්ථය කුමක්ද?
නාමල් අලි පැටියා ගේ ජිවිතය බේරා ගැනිම සදහා මුල්ම තොරතුර ලබා දුන් අම්පාර නාමල් ඔය ගම්මානයේ ගැමියනුත්, තොරතුර ලද විගස ඒ සම්බන්ධයෙන් සොයා බලමින් අවශ්‍ය කටයුතු සිදු කළ අම්පාර වනජීවී සෞඛ්‍ය කළමනාකරණ ඒකකයේ කාර්ය මණ්ඩලයත්, එවකට එම ඒකකය භාරව කටයුතු සිදු කළ පශු වෛද්‍ය ප්‍රමුදිත දෙවසුරේන්ද්‍ර මහතාත්, අම්පාර වනජීවී සෞඛ්‍ය කළමනාකරණ ඒකකය භාරයේ ප්‍රතිකාර ලැබූ මාස තුනහාමරකට ආසන්න වු කාලය තුළදී වෛද්‍ය ප්‍රමුදිත දෙවසුරේන්ද්‍ර මහතා නොමැති අවස්ථාවලදී නාමල්ගේ රෝගී තත්වය සදහා ප්‍රතිකාර ලබා දීම සදහා විශාල සහයෝගයක් සහ කැපකිරීමක් කළ අම්පාර රජයේ පශු වෛද්‍ය ලෙස එවකට සේවය කළ සපුමල් වෛද්‍ය තුමා සහ එතුමාගේ වෛද්‍ය බිරිදත්, අම්පාර මහ රෝහලේ ඇස් පිළිබදව එවකට සිටි වෛද්‍ය තුමා සහ අනෙකුත් වෛද්‍ය වරුන් සහ අලි පැටවාට කිරි , බෙහෙත් වර්ග ආධාර ලෙස ලබා දුන් අම්පාර ප්‍රදේශයේ ආදරණීය ජනතාව ඇතුළුව මහනුවර ප්‍රදේශයේ පින්වත් මහතුන් කිහිප දෙනෙකුත් බොහෝම ගෞරවයෙන් කෘතඥතා පූර්වකව සිහිපත් කළ යුතු බව උපුල් ප්‍රියංග මතකය අවදි කරමින් පවසයි.
උඩවලව ඇත් අතුරු සෙවණේ දිවි ගෙවන නාමල්ගේ ජීවිත කථාව අසන්නකුගේ සිත තෙත් කරමින් නෙතට කදුළක් එකතු කරයි. නාමල් ගේ කතාන්තරය හරහා අපට බෝහෝ දෑ උගත හැකි බව මේ කථාව අවසානයේ ඔබට වැටහෙනු නියතය. මෙම ලිපිය කියවා අවසාන වන ඔබගේ සිතේ අලින් රැක ගැනුම අරඹයා කළ හැකිදේ, කළ යුතු දේ ගැන එක් සිතුවිල්ලක් හෝ ජනිත වන්නේ නම් එය බෙහෙවින්ම වැදගත්ය.
⋆.සේයා රූ - Blue Green Media – Department Of wildlife Conservation.jpg)
.JPG)
Comments
Post a Comment